2024ko Donostiako agenda ekitaldiz gainezka dago. Errege-desfilearekin eta danborradarekin gogor hasi genuen urtea. Hurrengo hilabeteetan, inauteriak, Aste Nagusia, Kontxako bandera famatua eta Zinemaldi ospetsua gozatu genituen; eta urtea santomasekin eta Olentzerori eta Mari Domingiri harrera eginez bukatuko dugu.
Ez dugu nahi zuk ezer galtzea; beraz, kontsultagarri jarri dizkizugu hemen Donostiako 2024ko jai guztiak.
-
Donostiako errege-desfilea: 2024ko urtarrilaren 5a
-
Donostiako danborrada: 2024ko urtarrilaren 20a
-
Donostiako Kaldereroak: 2024ko otsailaren 3a
-
Donostiako inauteriak: 2024ko otsailaren 8tik 13ra
-
San Joan sua: 2024ko ekainaren 23a
-
Donostiako Aste Nagusia: 2024ko abuztuaren 10etik 17ra
-
Euskal Jaiak Donostian: Abuztuaren 28tik irailaren 8ra
-
Kontxako bandera: 2024ko irailaren 1etik 8ra
-
Zinemaldia: 2024ko irailaren 20tik 28ra
-
Gau Beltza Donostian: 2024ko urriaren 31
-
Donostiako San Tomaseko feria: 2024ko abenduaren 21a
-
Olentzero Donostian: 2024ko abenduaren 24a
2024ko Donostiako errege-desfilea: urtarrilak 5
Errege magoak urtarrilaren 5eko goizean, ostirala aurten, iristen dira urtero Donostiara; zehazki, Igeldo mendira.
Lanegun handia izaten dute: Udaletxeko harrerarekin hasten dira, eta desfile jendetsua egiten dute ondoren herriko kale nagusietan zehar. Gau luzea izaten dute gero opariak banatuz.
Hain egun berezia ahalik eta gehien aprobetxatzeko eta desfileaz gozatzeko lekurik onena aurkitzeko, onena da gure blogeko post hau irakurtzea, xehetasun guztiak ematen baitizkizugu.
Donostiako 2024ko danborrada: urtarrilak 20
![fiestas donostia tamborada fiestas donostia tamborada](https://blog.euskaltel.com/embed/7a62f982c8eb82ac12c1dda4e625c301719490112/fiestas-donostia-tamborada.jpg?imagick=1&size=750)
Iturria: Donostia Kultura
Danborrada da Donostiako jai nagusia. Eta Gizateriaren Kultura Ondare Immateriala da.
20.000 parte-hartzailek baino gehiagok eta 158 danborradak hartzen dute hiria euren danborrekin (eta upelekin) urtarrilaren 20an, Donostiako zaindari San Sebastianen egunean.
2024ko Donostiako Kaldereroak: otsailak 3
Otsaileko lehen larunbatean, Kaldereroak Donostiako kaleetan zehar ibiltzen dira, jantzi koloretsu eta ikusgarriekin.
Musikaren erritmoan eta metalaren soinu nonahikoarekin (zartaginak, ontziak eta gainerako tresnak jotzearen ondorio), inauteriak noiz iritsiko diren iragartzen dute.
2024ko Donostiako inauteriak: otsailak 8-13
![fiestas donostia carnaval fiestas donostia carnaval](https://blog.euskaltel.com/embed/aa1580286e98e14facde3fa5d9bb71719490196/fiestas-donostia-carnaval.jpg?imagick=1&size=750)
Iturria: Donostia Kultura
Donostia osoak entzuten duenean "Donostiarrei oihu egitera gatoz, pozaldiz!", Donostiako Martxa ospetsuarekin inauteriei hasiera ematen zaie.
Zazpi egunetan mozorroak, txarangak, konpartsak eta desfile handi bat izaten dira disfrutatzeko. Bukaeran, sardina-ehorzketa tristean, festa hurrengo urtera arte agurtzen da.
San Joan sua 2024: ekainak 23
San Joan bezperako gaua urteko magikoenetako bat da.
Donostian, udako solstizioarekin batera, su herrikoiak (auzoetakoak, eta jendetsuena Saguesen) eta dantza tradizionala datoz. Urtero, Goizaldi dantza-taldeak Konstituzio plazan jartzen den lizarraren inguruan dantza egiten du, 1700. urteko tradizio bati jarraikiz.
Donostiako 2024ko Aste Nagusia: abuztuak 10-17
![fiestas donostia aste nagusia fiestas donostia aste nagusia](https://blog.euskaltel.com/embed/bdbf3b1367068363e696e1f2bfda1719490279/fiestas-donostia-aste-nagusia.jpg?imagick=1&size=750)
Iturria: Donostia Kultura
Erraldoi eta buruhandiak, su artifizialen nazioarteko lehiaketa eta musika ona gozatzeko gogoz? Gogoan hartu Donostiako 2024ko Aste Nagusiko datak: abuztuaren 10etik 17ra.
Kanoikadaren eta "Artillero dale fuego" ezagunaren ondoren, Donostiako kaleak festa hutsa dira. Food truck-ak, lehiaketa gastronomikoak, atrakzioak, haurrentzako jarduerak eta abar daude. Ikusi hemen Donostiako Aste Nagusiko programa osoa.
Donostiako 2024ko Euskal Jaiak: abuztuak 28 – irailak 8
Kultura, kirola, gastronomia, folklorea eta tradizioa uztartzen dira Donostiako Euskal Jaietan.
Aukera ona da artisau-sagardorik onena dastatzeko eta Sagardo Egunean pintxo bat jateko; trikitilari, txistulari eta dantzariekin gozatzeko; edo gure herri-kirolen lehiakortasuna bizitzeko.
2024ko Kontxako bandera: irailak 1 eta 8
Iraileko lehenengo bi igandeetan, emakumezkoen eta gizonezkoen traineru onenak Kontxako bandera desiratua lortzeko lehiatzen dira Donostian.
Estropada klasiko hau 1879tik egiten da. Arrain-kala onenak aurkitu eta portura lehenbailehen zein itzul zitekeen ikusteko moduan hasi zen txapelketa hau, eta urtero milaka bisitari biltzen dituen kirol-ekitaldi handi bihurtu da.
2024ko Zinemaldia: irailak 20-28
Europako zinema-ekitaldirik handienetako bat da Donostiako Nazioarteko Zinemaldia.
1953az geroztik egindako hitzorduari jarraikiz, sariketak nazioarteko titulu eta izen handiak biltzen ditu bere palmaresean eta proiekzio-egutegi zabalean (lehiaketakoak eta erakustaldikoak).
2024ko Gau Beltza Donostian: urriak 31
Urteko gaurik beldurgarrienean, Gau Beltza ospatuko du Gipuzkoako hiriburuak.
Antzinako tradizioa da, zeltengandik jasoa, eta elementu nagusiak kalabaza zizelkatuak, kandela piztuak... eta beldurrezko istorioak dira.
Jaiaren epizentroa Altzan dago, Animen Ibilbidearekin. Hala ere, hainbat auzotan, hala nola Antiguon eta Txominenean, txokolatadak eta haurrentzako jarduerak antolatzen dira.
2024ko San Tomas azoka Donostian: abenduak 21
A zer azoka antolatzen den Donostian San Tomas egunean. Egun horretan, landa-merkatu erraldoi bat bihurtzen da hiria, eta baratzeko produktuak, gazta, eztia eta txistorra eros eta dasta ditzakezu. Sagardoz edo txakolinez lagunduz gero, are hobeto.
Gainera, urtero izaten dira musika, kirola, bertsolariak, tailerrak eta haurrentzako jarduerak eta gonbidatu bereziak, hala nola urtero jaiaren buru den txerri handia.
Olentzero eta Mari Domingi Donostian 2024an: abenduak 24
![fiestas donostia olentzero fiestas donostia olentzero](https://blog.euskaltel.com/embed/ddb0c286a0ede5ab46b4b170b3e41c2f76a51719490427/fiestas-donostia-olentzero.jpg?imagick=1&size=750)
Iturria: Donostia Kultura
Katxola baserria da Donostiako Olentzero eta Mari Domingiren desfilearen abiapuntua.
Udaletxeko balkoitik agurra egin ondoren, gure ikazkin maiteak eta Mari Domingik kale eta auzo askotan zehar desfilatzen dute, txikiek eta ez hain txikiek ondo pasa dezaten. Guztiak zain egoten dira gau horretan beren etxeetara opariak noiz eramango.
Hona hemen Olentzeroren eta Mari Domingiren Donostiako desfilearen ibilbidea eta ordutegiak.
Horiek dira 2024ko Donostiako jai nagusiak. Begira zenbat aukera dauden eta zenbat planetan hartu dezakezun parte ;)
Goiburuko irudiaren iturria: Donostia Kultura.