Makinek giza adimena “imitatzen” dutenean eta datu kopuru handiak bildu ondoren zenbait lan egiteko gai direnean, adimen artifizialaz ari gara. Beharbada zientzia-fikzioaren antza hartuko diozu, baina, egia esan, adimen artifiziala nonahi dago gure eguneroko bizitzan. Testuak itzultzeko, musika konposatzeko edo bideo zein argazkiak hobetzeko erabil ditzakezun adimen artifizialeko tresnen hautaketa bat prestatu dugu.
Siri, Alexa edo ChatGPT jada gure bizitzaren zati dira..., eta adimen artifiziala erabiltzen dute.
Baina adimen artifizial deritzona ez da horren berria, termino hori John McCarthy informatikariak sortu baitzuen 1956an.
Baina orain iritsi da teknologia gure eguneroko bizitzarako soluzio eta tresnak lortzeko gai izatera.
Adimen artifizialaren eguneroko erabilerak
Edukien streamingeko plataformek adimen artifizialari esker dute gure gustu eta ohituren arabera telesailak edo filmak gomendatzeko aukera.
Eta adimen artifizialari esker bihurtu dira Siri, Alexa edo antzeko ahots-morroiak gure eguneroko jarduerekin laguntzen diguten aliatu.
GPSek, ChatBotek edo etxe adimenduneko soluzioek ere erabiltzen dute.
Beraz, soluzio eta tresna asko daude, adimen artifizialak gure bizitzak hobetzeko dituen abantailez baliatzen direnak eta, gainera, doakoak direnak.
Adimen artifizialeko doako tresnak
Bing Image Creator
Bing Image Creator tresnarekin irudi bat sortzeko, deskribapena idatzi behar duzu eta testuinguruari buruzko zerbait azaldu, hala nola tokia edo jarduera. Ondoren, arte-estilo bat aukeratu behar duzu, eta prest izango duzu irudia.
Horrela funtzionatzen du hitzetatik abiatuta irudiak sortzeko aukera ematen duen eta Bing-en txatean integratuta dagoen tresna honek. Hala, nahikoa da txatean bertan “irudi bat marraztu” edo “irudi bat sortu” esatea.
Hypotenuse AI
Hypotenuse AI gai da artikulu oso bat 25 hizkuntzatan sortzeko, ematen dizkiozun hitz gakoetatik abiatuta.
Eta, Lengoaia Naturalaren Prozesamenduari esker, automatikoki sor ditzakezu nahi duzun tonu, estilo eta egiturarekin pertsonalizatutako produktuen deskribapen edo fitxak ere.
DeepL
Itzultzaile automatiko eraginkor eta zehatz bat behar duzu, ñabardura txikiak ere kontuan hartzeko gai dena? DeepL tresnak kalitate handiko itzulpen automatikoa eskaintzen du, 20 hizkuntzaren baino gehiagoren artean.
Kalitatea hobetzeko, DeepL tresnak test itsuak egiten ditu. Horietan, itzultzaile profesionalek egokiena iruditzen zaien itzulpena aukeratu behar dute, egilea nor den jakin gabe.
Image Enlarger
Zure irudiei HD kalitatea emateko aukera on bat Image Enlarger eta tresnaren mailaketa-teknologia dira.
Irudia handitzeko aukera ematen du, xehetasunik galdu, pixelatu edo distortsionatu gabe, eta irudi-mota desberdinekin funtzionatzen du, hala nola ilustrazioekin edo argazkiekin.
Doako bertsio bat du, hodeian, eta Windows edo Mac ekipoetan erabil daiteke.
Humata
Humata tresnak pdf dokumentuetako informazioa bilatzen eta aztertzen du.
Oso sinplea da: fitxategi bat igotzen duzu eta Humata tresnak informazioa prozesatzen du. Jarraian, edukiari buruzko galderak egin diezazkiokezu, edo laburpen bat eskatu.
Gehienez ere 60 orrialde dituzten artikuluekin lan egiteko aukera ematen du.
Cutout Pro
Diseinu bisualeko “dena batean” plataforma, bideo eta argazkiak editatzeko.
Aukera interesgarri ugari eskaintzen ditu: nahi ez diren hondo edo objektuak ezabatzen ditu, ebaki bereziak egiten ditu, margotu egiten du, edo animazio-efektuak gehitu. Erabilgarria da, adibidez, argazki zaharrak zaharberritzeko, edo sare sozialetarako edo eCommercerako irudiak sortzeko.
ChatGPT eta Open AI
OpenAI enpresak sortutako txata aplikazio ezagunenetako bat da, eta aitzindaria, gainera, adimen artifizialaren erabilera masiboan.
ChatGPT tresnak galdera, erantzun eta zuzenketetatik abiatuta biltzen ditu datuak, eta hala ikasten du. Informazio eta datu kopuru izugarria du, eta gai da ia edozein kontsulta edo galderari modu zehatz, labur eta naturalean erantzuteko.
Synthesia
Zuk testu bat idatzi, eta tresna honek bideo profesional bat sortuko du, kalitatezko ahots eta lokuzioekin.
Adimen artifiziala erabiltzen duen multimedia-sorkuntzako plataforma hau gai da 100 hizkuntzatan baino gehiagotan lan egiteko, eta aukera ematen du adimen artifizialeko zure abatarra sortzeko ere.
AI Dungeon
Zeure joko, erronka edo abentura sortzea, adimen artifizialari esker.
Hori da AI Dungeon tresnaren helburua. Bideojoko hau istorio pertsonalizatu eta mugagabeak sortzeko gai da, deskribapen sinple bat emanda testu-formatuan.
Zuk aukeratzen dituzu gaia, pertsonaiak eta izenak, eta nahierako eszenak, probak eta erronkak izango dituzu. Gainera, beste erabiltzaile batzuekin partekatzeko aukera izango duzu.
Amper Music
Amaitzeko, adimen artifizialeko tresnarik musikalena aurkeztuko dizugu.
Amper Music tresnak melodiak edo soinu-bandak sortzeko aukera ematen du.
Soinu berriak, konbinazioak eta nahasketak proba ditzazun, edo zure konposizioa hasieratik sor dezazun, nahi duzun estiloarekin, iraupenarekin eta “aldartearekin”.
Bideoak, argazkiak, itzulpenak, abestiak... Adimen artifiziala erabiltzen duten doako tresna eta soluzioak hain dira zabalak, askotarikoak eta erabilgarriak, ezen ez baituzu jakingo zein aukeratu :)