Aurten ere, Momo jainkosaren etorrerarekin hasiko dira Donostiako inauteriak, hiriko giltzak ematen zaizkionean. 2024ko otsailaren 8tik (osteguna) 13ra (asteartea), mozorroz, konpartsaz eta txarangaz beteko dira Donostiako kaleak. Hemen duzu 2024ko Donostiako inauterien egitarau osoa.
2024ko Donostiako inauterien egitaraua
Donostiako inauteriei San Sebastian Martxaren oihu honek ematen die hasiera: "Donostiarrei oihu egitera gatoz, pozaldiz! Inauteriak datoz!"
Zazpi eguneko alaitasuna eta bizitasuna ditugu aurretik, lotsagabekeria- eta irudimen-dosi egokiarekin, baina, batez ere, ederki pasatzeko gogo galantarekin.
Donostiako inauteriek ez diete atsedenik ematen dibertsioari.
Egiazta ezazu zuk zeuk Donostiako 2024ko inauterien programan.
2024ko Donostiako inauterien kartela
2024ko Donostiako inauterietako kartelaren izenburua "Caballero Dragón" da, eta Luis Ángel Argoteren lana da.
Bertan, Erdi Aroko zaldun bat ikusten da Urgull mendiaren gainean, Kontxako barandaren omenezko betaurrekoekin eta Maria Kristina zubiko faroletako dragoiarekin eta ezpatarekin. Haren jantzia urdina eta zuria da, Donostiako armarria bezala.
Ostegun-inauteria Donostian: Momo jainkosa dator
Ostegun-inauterian, Momo jainkosa iritsiko da Donostiara. Kalez kale ibiliko da, txarangak bidelagun dituela. Hiriko giltzak jaso, eta inauteriak amaitu arte zainduko du.
Urtero, konpartsa jakin bati dagokio Momo jainkosa (inauterietako erregina) eta haren ezinbesteko segizioa gorpuzteko ohorea.
2024ko Donostiako Inauterietako Momo jainkosarena Mabel Vidal Sastrek egingo du. Lydia Simón Callejón, Joseba Vergara Torner eta Irati Núñez Calzada izango ditu lagun. Showtime konpartsakoak dira denak.
Momo jainkosa hirian barrena ibiltzen da, eta, gainera, adinekoen egoitzetara eta osasun-zentroetara joaten da.
Ostiral-inauteria Donostian: konpartsen aurkezpena
Ostiral-inauterian, konpartsek beren poza eta festarako gogoa kutsatzen diete donostiarrei eta bisitariei, desfile koloretsuen bidez.
Konpartsen aurkezpena da, hain zuzen ere, ekitaldi jendetsuenetako bat. Azken urteotan Illunbeko Zezen Plazan egin izan da ostiral-inauterian. 26 konpartsak parte hartu zuten Donostiako inauterien azken edizioan. Denetarik zegoen han: dragoiak eta bikingoak, amazonak, modaren divak, manga, musikako klasikoak...
Prestatzen joan zaitezen, hemen duzu 2023ko aurkezpena. Donostiako Udalaren Youtubeko kanal ofizialean jarraitu ahal izan zen, streaming bidez.
2024an, Youtubeko kanalean ere ikus dezakezu Ilunbeko konpartsen aurkezpena, otsailaren 9an, ostirala, 21:00etatik aurrera.
Larunbat-inauteria Donostian: konpartsa historikoen protagonismoa
Larunbat-inauteriko une berezi bat koral batek Momo jainkosari kantatzen dizkion goiztiriak izaten dira.
Horretaz gain, txarangek eta konpartsek etengabe desfilatuko dute kaleetan barrena. Haiekin bat egingo dute mota askotako dantzariek (hasi tango-dantzariekin eta euskal dantzarietara).
17:00etan, inauterietako desfilea egingo da, eta, geroxeago, 19:00etan, konpartsa historikoen txanda izango da. Konpartsa horiek 1814ko lehen konpartsen espirituari eusten diote (garai hartan, ikasleek, lagun-taldeek eta artisauen gremioek osatzen zituzten). Denetarik dago konpartsa horietan: lorezainak, danborrada, lanpernak, kaldereroak, oilarrak...
Igande-inauteria Donostian: inauterietako dianaren osteko festa
Igande-inauteria goiz hasten da Donostian. 09:00etan, inauterietako diana Udalaren Txistulari Bandaren eskutik.
Ondoren, konpartsek bata bestearen atzetik desfilatuko dute, eta amaieran inauterietako desfile handi bat egingo da.
Konpartsak hiru kategoriatan banatzen dira, parte-hartzaile kopuruaren arabera, eta lehian aritzen dira sariren bat eskuratzeko.
Sari gutiziatuena Inauterietako Sari Nagusia da. Hura eskuratzeko aurkari gogor bat garaitu behar da: Eureka konpartsa (azken lau urteetan irabazi du sari hori).
Hainbat sari daude: Umorearen Sari Nagusia, Jantzien Diseinu Onena... Izan ere, saritu egiten dira beren asmamenagatik eta originaltasunagatik nabarmentzen direnak.
Astelehen- eta astearte-inauteriak: sardinaren ehorzketa
Sardina lurperatu aurretik, jaiegun bat geratzen zaigu oraindik: astelehen-inauteria.
Sardinaren ehorzketa astearte-inauterian ospatzen den hileta berezi bat da. Deabruak, apaizak, mamuak, aztiak, mojak, eta alargunak joaten dira, besteak beste.
Dena dela, oraindik ez da amaitu Donostiako inauteria. Hurrengo larunbatean eta igandean, hainbat lagunek parte hartzen dute "eltze festan".
Donostiako inauteriak auzoetan
Auzoetan ere gogoz bizitzen dira inauteriak, eta zabala izaten da publiko eta adin guztiei zuzendutako jardueren agenda.
Etxeko txikientzat, inauterietako maskara- eta dekorazio-tailerrak, mozorro-lehiaketak eta karaokea.
Nagusientzat, berriz, dantza eta festa.
Erraldoi eta buruhandiak ere ez dira faltako auzoetan.
Jaia biribiltzeko zer hoberik herri-bazkariak eta gastronomia-dastaketak baino.
Kosta egiten da agur esatea horrelako festa-giro alaiari. Eta horrelaxe da duela zenbait hamarkadatik.
Donostiako inauterien historia
XX. mendearen hasieran, Donostiako inauteriek ikusmina eta ospea lortu zituzten.
Sarriegik, danborradako doinuen eta kaldereroek abestutako abestien egileak, bi kantu konposatu zituen espresuki festa horretarako; gaur egun, oso ezagunak dira: Mariscos en tierra eta Lamentos de un chipirón.
1924an, inauteriek kalte handia jasan zuten, festa horiek berezkoak zituzten jolasa eta tolerantzia debekatu baitziren. Ondorioz, esparru pribatura mugatu behar izan ziren.
70eko hamarkadan, berreskuratu egin zen ospakizuna, bereziki tokiko elkarte eta erakundeen lanari esker.
Ordutik, Donostiako inauteriek sasoi ona eta ospe ezin hobea dituzte, eta historia, tradizioa eta modernitatea uztartzen dituzte.
Beraz, ez galdu Donostiako inauteriez bapo gozatzeko aukera.
Goiburuko irudiaren iturria: Donostia Kultura.