Ekainaren 20tik 24ra bitartean, Leioak alaitasunez beteriko San Joan jaiak ospatuko ditu. Musika, gastronomia, kirola, tradizioak... denetarik eskaintzen duen eta bertakoei eta bisitariei huts egiten ez dien programa bat. Hemen duzu Leioako sanjoanei buruzko ezinbesteko informazioa.

Aurten ere urteroko hitzordua Leioan, non jai-giro bikaina izaten baitute sanjoanetan. Besteak beste, honako hauek izango dira: jaiei hasiera ematen dien txupinazoa, kuadrillak beti bezain aktibo, kirol-txapelketak (egungo kirolenak eta tradizionalenak), aurresku ofiziala, jendez beteriko sua... Zalantzarik gabe, Leioan izugarri gozatzen dute herriko jaiez.

Leioako 2024ko San Joan jaien egitaraua

Hona hemen 2024ko Leioako San Joan jaien datak: ekainaren 20tik 24ra. Aurreko egunetan jarduera batzuk egiten badira ere, horiek dira data ofizialak.

Leioako sanjoanak udaletxeko balkoian egiten den txupinazoarekin eta pregoiaren irakurketarekin hasten dira ofizialki. 2024an, ekainaren 20an (osteguna) izango da hitzordua, 19:00etan.

Ondoren, kuadrillak jaitsiko dira (ia ehun bat), eta txosnak irekiko dituzte.

Eta dena prest Leioan ekitaldiz beteriko lau jaiegun trinkoz gozatzeko. Hemen duzu Leioako 2024ko San Joan jaien egitaraua, ezer gal ez dezazun.

Leioako sanjoanen 2024ko kartela

cartel fiestas leioa 2024

Leioan, urtero gogotik saiatzen dira San Joan jaietarako kartelik onena aukeratzen.

Ikusmina hain da handia, ezen 2024an 600 boto baino gehiago jaso baitira kartel gogokoena aukeratzeko. Eta horri epaimahai aditu baten iritziari batzen badiogu, badugu kartel irabazlea.

Aurtengo irabazleak "Recortes" du izena, eta Leioako elementu esanguratsuak eta jai-giroa erakusten ditu, eta, gainera, keinu bat egiten dio aniztasunari. Kartelaren egilea Nuria González da, Leioako biologo, ilustratzaile zientifiko eta diseinatzaile grafikoa.

Aurkezpen-gutun paregabea dozenaka jarduera eta familia osoarentzako aukerak eskaintzen dituzten jai batzuentzat.

Zein dira Leioako sanjoanetako jarduerak?

fiestas leioa hoguera

Iturria: Leioako turismoa

Leioako San Joan jaietan ez da dibertsiorik eta entretenimendurik falta gustu eta publiko guztientzat.

Leioarrek eta bisitariek ohiko barrakez, erromeriez, kontzertuez eta kalejiraz gozatuko dute.

Jende asko biltzen da, halaber, kontzertuetan. Eszenatokiak Carboneran (Agirre Lehendakariaren plaza) eta txosnen gunean (Elexalde) egon ohi dira.

Egunean zehar, kirol-lehiaketak izaten dira; esaterako, arrantza-txapelketa tradizionala, Lertutxe urtegian, eta txirrindulari-lasterketa, baita karate- eta patinaje-erakustaldiak ere. Aurrekoez gain, xake-, saskibaloi-, pilota- eta eskalada-txapelketak ere izaten dira.

Herri-kirolak ere ez dira inoiz falta Leioako sanjoanetan, bai Kirolaren Jaiaren egunean, non harri-jasotzaileak eta aizkolariak ikusiko baititugu, bai Euskadiko Sokatira Txapelketan.

Gastronomia onak ere ezin du huts egin: txokolatada, sardina-jana, saiheski-jana eta hainbat lehiaketa gastronomiko; haien artean, Antzinako Eguna da ezagunena. Nork prestatuko du aurten Leioako sanjoanetako paellarik onena?

Txikientzat, animazioa, magia, haurrentzako tailerrak eta herri-jolasak.

Leioako sanjoanetako tradizioak: alardeak, poteoa eta aurreskua

Tradizioa oso presente dago beti Leioako San Joan jaietan.

Horren erakusgarri bikaina da dantza-taldeak Boulevardean egiten duen Alarde ikusgarria.

Leioako sanoanetan falta ez den beste tradizio bat Akelarreko poteoa da.

Eta ez dezagun ahaztu Leioan bereziki errotuta dagoen tradizio bat: Elizaurreko aurreskua.

Historiak dio baserritarrak jaietako igandean mezetara jaisten zirela eta alkateari baimena eskatzen ziotela dantza hori han bertan egiteko. Beraz, dantzariek Elizaurreko aurreskua dantzatzen zuten XVIII. menderako.

Tradizioa zenbait hamarkadaz galdu bazen ere, 1981. urtean berreskuratu egin zuten mendetako dantza hori, eta Leioako San Joan jaietako ekitaldirik sinbolikoenetako bat bihurtu da. Igandean ospatzen da, jaietako egun handian, eta herriko abesbatzek eta orfeoiek ere parte hartzen dute.

Azkenik, herri-tradizioez ari garela, ekainaren 23ko gauean egiten den San Joan sua eta traka aipatu behar ditugu, giro handieneko uneak izaten baitira.

Eta ekainaren 24an, astelehenean... jaien amaiera. Hurrengo urteko Leioako sanjoanak arte itxarotea egokitzen zaigu orain.

Goiburuko irudiaren iturria: Leioako turismoa.