Urtero, otsailaren 3an, euskaldun askok jartzen du lepoan San Blas lokarria. Nondik dator tradizioa? Lokarriaren historia kontatuko dizugu, eta noiz erre behar duzun azalduko.
Eztarriko gaixotasunen zaindaria da San Blas, eta otsailaren 3an ospatzen da haren eguna. Egun horretan, ohikoa da lepoan koloretako lokarriak ikustea Euskadin.
Izan ere, tradizioa da koloretako kotoizko lokarri bat jartzea lepoan, aurrez San Blasen irudiaren aurrean bedeinkatua, eztarriko gaitzetatik babesteko.
San Blasen tradizioa
Lehenik eta behin, lokarria eskuratu behar duzu.
Erosi egin dezakezu, eta herri batzuetan doan banatzen dituzte.
Lokarria eskuratuta, San Blasen irudia dagoen eliza batera joan behar duzu, eta haren aurrean bedeinkatu.
Eta, gero, lepoan jarri.
Noiz erretzen den San Blas lokarria
Tradizioak dioenez, San Blas lokarria 9 egunez eraman behar da lepoan, hilaren 3an bertan kontatzen hasita.
Santuekiko deboziozko ohitura bat da "bederatziurrenaren" hori, eta oso sustraitua dago tradizio kristauan.
Egun horiek igarota, lokarria lepotik kendu, hatzekin hartu, eta sutan erretzen da, purifikazio-elementua baita sua.
Une horretatik aurrera, ez duzu izango eztarriko minik, katarrorik eta eztulik.
San Blas lokarriaren jatorria
San Blas lokarrien tradizioa oso antzinakoa da; IV. mendekoa, hain zuzen.
Garai hartakoa da Blas obispo, mediku eta ermitau .
Kondairak dioenez, eztarrian arrain-hezur bat kateatu zitzaiolako hiltzear zen haur bat sendatzea lortu zuen.
Blas Sebastekoa, jatorriz armeniarra, otsailaren 3an jazarri, atxilotu eta exekutatu zuen Linizio enperadoreak, baina haren mirariaren berri Euskadi osoan zabaldu zen, eta gaur egun ere oso presente dago.
San Blas lokarria Euskadin
Jai honek erlijioarekin duen loturaz harago, San Blas lokarriaren tradizioak ospe handia du herri batzuetan, haien artean Laudio, Elgoibar eta Abadiño.
Abadiñon, baserritarren azoka egiten da San Blasetan. Lokarriez gain, artisauen eta baserritarren produktuak egoten dira, eta, gainera, protagonismo handia izaten dute kirol-probek, idi-probek eta herri-kirolek ere.
Laudion, Hausterre asteazkenera arte edukitzen dira lokarriak lepoan, eta garizuma eta penitentzia-aldia hastearekin batera kentzen dira.
Herri askotan, bertako gastronomia dastatzeko eguna ere izaten da San Blas, eta azoketan ez dira falta izaten San Blas opilak.
Makina bat herritar eta bisitari joaten dira malba-gozokiak, anis-erroskilak, galletak edo San Blas opilak erostera. Elgoibarren, gatza eta San Blas opilak ere bedeinkatzen dituzte.
Eta Idiazabalen eta Páganosen ere ez dira falta izaten lokarriak, baserritarren produktuak, lehiaketa gastronomikoak, musika eta dantza.
San Blas lokarria Bilbon
Bilboko San Nikolas plazan egiten da, San Blasen irudia duen elizaren ondoan, azoka ezagun eta jendetsuenetako bat.
Areatzan San Blas lokarria eskuratu, eta tenplu horretara joaten dira bilbotarrak beren lokarriak eta ingurukoenak bedeinkatzera, edo elizan bedeinkatuta ematen dituzten lokarriak hartzera.
Kaleetan gozoki-usaina izaten da nagusi debozioa eta gastronomia bikain uztartzen dituen egun horretan.
Jarraitu tradizioari: otsailaren 3an, eskuratu zure San Blas lokarria. Bederatzi egun geroago, erre; ez duzu eztarriko minik izango!
Goiburuko irudiaren iturria: Bilboko elizbarrutia.