2026ko Zapato Azule Ondarroan: programazioa, ordutegia...

Ekaineko azken larunbatean, urtero, mahoi-urdinez janzten da Ondarroa, Zapato Azule ospatzeko. Jai herrikoia da, kuadrillakoekin kalean gozatzekoa. Tradizioa eta kirola uztartzen ditu, eta itsasoko jendea omentzen du, haien jantzi tipikoaren bidez. Noiz ospatuko da Zapato Azule Ondarroan 2026an? Ekainaren 27an (larunbata) ospatuko da aurten; hona hemen ordutegia eta 2026ko Zapato Azuleren programazioa.

2026ko Zapato Azuleren programazioa

Orain badakizu noiz izango den Zapato Azule 2026an, eta, beraz, has zaitezke prestatzen.

Egun horretan, Ondarroan, ez dira faltako txosnak (Musika plazan), kaleko musika, elektrotxarangak, bertsolariak, dultzaineroak, irrintziak eta euskal dantza tradizionalak. Ezta gaueko erromeria ere.

2026ko Ondarroako Zapato Azuleko bi protagonistak ahaztu gabe: kamiseta-azoka eta Dinamartxa.

Hemen duzu Ondarroako Zapato Azuleko programa osoa.

2026ko ekainak 26, ostirala

• 22:30. Itsasaurreko geltokitik: Tolosara joateko autobusa, Dinamartxa mendi-martxan parte hartu nahi dutenentzat.

2026ko ekainak 27, larunbata

• 01:00etan Tolosatik Ondarroara: Dinamartxa: mendi-martxa.
• 07:00. Itsasaurreko geltokitik: Tolosara joateko autobusa, Dinamartxa bizikleta-martxan parte hartu nahi dutenentzat.
• 09:00. Tolosatik Ondarroara: Dinamartxa: bizikleta-martxa.
• 11:00. Radixu Irratiaren kaleko zuzeneko emisioa.
• 11:00. Latxanbre plaza: Euskal Herriko kamiseta-azoka
• 11:00 Kanttoipe bihurgunea: Artisau-azoka.
• 12:00. Alai tabernako balkoitik: ZAPATO AZULE 2026 jaiaren hasiera. Txosna irekitzea alde zaharrean.
• 12:10. Ondarroako Txistulariak kalerik kale.
• 12:30. Kalekutzeko eskailerak: Txalainak.
• 13:30. Kalekutzeko eskaileretan, falta direnak gogoan hartzeko omenaldia.
• 13:30. San Pedro iturritik Zubi Zaharrerantz, Kresala banda eta Artelango erraldoiak .
• 14:00. Dinamartxaren iritsiera. Ongietorria Alaiko balkoitik irrintzilariekin, Kresala bandak lagunduta.
• Ondoren, Radixu Irratiaren pregoia eta aurtengo omendua nor den jakinaraztea.
• 14:45. Alai tabernako balkoitik: EHko eta Ondarroako kamiseta onenei eta Ondarroako erakusleiho onenari saria ematea, eta Cantabrico jatetxeak oparitutako lagun birentzako afariaren zozketa.
• 15:00. Euskal Herriko Kamiseta Azokaren itxiera.
• 15:00. Kalekutz: Sketch de Txo! Antzerki Kolektiboaren esketxa omenduari.
• 15:30. Bazkaltzeraaaaaa!
• 17:00. Itsasaurre: Altxa Porru.
• 17:00. Frontoia irekitzea.
• 18:00. Kalekutzeko eskailerak: DJ Kol.
• 18:00. Kafeko Atzea: Haur-jolasak (Txirrimorraski).
• 18:00. Pilotalekua: Zerotan.
• 18:30. Itsasaurre: Zumba.
• 19:00. Itsasaurre: Altxa Porru.
• 20:00. Kafeko Atzea: Euskal erromeria: bakarkakoa eta Larrain dantza.
• 20:00. Pilotalekua: DJ Lyma.
• 20:30. Itsasaurre: DJ Mali.
• 21:00. Kafeko Atzea: Erromeria: Musutruk. Ondoren, DJ Jotatxo.
• 22:30. Frontoia: IranJaise kolektiv.
• 22:30. Itsasaurre: Kumbialari.
• 00:00. Itsasaurre: DJ Tintz.
• 00:30. Pilotalekua: DJ Puntx.
• 02:30. Pilotalekua: Ogia txintxortarekin.
• 03:00. Itsasaurre: DJ Txustiyas.
• 04:30. Pilotalekua: DJ Enabil.

2026ko Zapato Azuleko kamiseta-azoka

Arrantzaleek janzten zituzten alkandoren koloreari zor dio izena Zapato Azulek. Festa honetako jantzi ofiziala da, eta baita Euskal Herriko kostaldeko beste festa askotakoa ere.

Hain zuzen, kolore hori, Ondarroako Zapato Azuleren sinboloa izateaz gain, ez da inoiz falta izaten kamiseten azokan ere —goizean hasita egiten da azoka, Latxanbre plazan—.

Euskadiko toki guztietatik heltzen dira kamiseta-saltzaile eta -erosleak Zapato Azulera. Bertaratzen direnek profesionalen eta enpresen dozenaka stand bisitatu ditzakete, eta hainbat modelo ikusi, baina guztien erreferente nagusia mahoi-urdina da, ospakizunaren ikurra.

Kamisetak salgai egoteaz gain, lehiaketan ere parte hartzen dute, eta sariak egoten dira; esaterako, herriko jantzi onenarentzat edo diseinu originalenarentzat.

2026ko Ondarroako Zapato Azuleko Dinamartxa

Ondarroako Zapato Azuleko beste tradizio garrantzitsu bat Dinamartxa da. Mendiko txirrindularitza-proba bat da, eta Dina Bilbao herriko triatloi-txapeldunaren omenez egiten da. 1997ko ekainean desagertu zen, Karibe itsasoan, katamaran-zeharkaldi bat egiten ari zela.

Ibilbidea Tolosan abiatzen da, Dina bizi izan zen herrian, eta Ondarroara iristen da, haren jaioterrira. Iritsierak ikusmin handia sortzen du ondarroarren eta bisitarien artean.

Ondarroako Zapato Azuleko abestia

2026ko ekainaren 27an Ondarroako Zapato Azulera joatekoa bazara, Zapato Azule abestiaren letra buruz ikastea edo idatzita eramatea gomendatzen dizugu.

Izan ere, jaiak bere abestia du. Esne Beltzak sortu zuen. Taldeak reggae edo hip-hop doinuak musika-tresna tradizionalekin nahasten ditu, esaterako trikitiarekin.

Honela dio Ondarroako Zapato Azuleko abestiaren letrak:

Kili-kilixak etxestazuz atzamartxukin ulin

Hain matxagarri zaz arrantzalin erropa azulin

Eta biztuxun Radixu

Pasakorou

Geu bixok Auiminyulinblu

Faltaten dizenak gogun hartute kalin barrena

Herritxik sorturana baño ez ei de herrixana

Eta biztuxun Radixu

Pasakorou

Geu bixok Auiminyulinblu

Eta jaixan lo bailao bailao esta klaro" gelditxu daixule

Behintzat ez eixule esan gero aurrez abisa ez netsule

Seguru na ta zeuri be barrurarte ailako gatsule

Ondarru kolorez janzten daben Zapato Azule!

Ondarroa eta Zapato Azule

Ondarroa "Zubien Herria" da; Artibai ibaiaren inguruan sortutako zubi ikusgarrietatik datorkio goitizena (Itsasaurre da bat, eta Harrizko Zubi Zaharra, bestea).

Bizkaiko kostaldean dago herria, eta itsaslabar malkartsuak ditu inguruan; esaterako, Fraile haitza. Portua, berriz, Euskadiko garrantzitsuenetako bat da.

Ondarroaren marinel-izaera alde zaharrean ere ikusten da: Erdi Aroko trazadurari eusten dio, eta Eusko Jaurlaritzak Kultura Ondare izendatu zuen 1994an.

Hain zuzen ere, kale estu eta aldapatsuz betetako erdigune historiko hori da Zapato Azule jaiaren erdigunea.

Ondarroako Zapato Azule duela 20 urte sortu zen. Hasiera batean herriko aldizkari txiki bat finantzatzeko aitzakia izan zen, baina, zenbateko arrakasta izan zuen ikusita, hurrengo urteetan ere egiten jarraitu da; urtetik urtera bisitari gehiago izaten ditu, gainera.

Zapato Azule Bolo-bolo elkarteak antolatu zuen urte askoan, baina gaur egun Radixu Irratia arduratzen da Ondarroa Euskal Herriko jai-egutegiko ezinbesteko erreferente bihurtzen duen jaia antolatzeaz.

Beraz, badakizu: 2026ko ekainaren 27an, larunbata, zatoz Ondarroara, Zapato Azule ospatzera.

Goiburuko irudiaren iturria: Ondarroako Turismo Bulegoa