Apirilaren 3tik 8ra bitartean, bizikleta gainean ikusiko ditugu egungo txirrindulari onenak, Itzuliaren aurtengo edizioan lehiatzen. Proba oso berezia da Euskaltel Euskadiko gure txirrindularientzat, 2021ean ekin baitzioten atzera lehiatzeari, zortzi urtez parte hartu gabe egon ondoren. Jarraian, xehetasun gehiago kontatuko dizkizugu txirrindularitza-proba honen historiari, ibilbideari eta parte hartuko duten taldeei buruz.

Prest marea laranjarekin bat egiteko aurtengo Itzulian? Hartu indarra eta prestatu Itzuliak aurten egingo dituen 990 kilometroetan barrena sufritzeko eta gozatzeko. Txirrindularitza-lehiaketa guztiz finkatua eta itzal handikoa da Itzulia, eta aurten 62. edizioa izango du.

Itzuliaren historia

1924an izan zen EAEko eta Nafarroako lurretan eginiko lehen txirrindularitza-lasterketa profesionala. Urte hartan, Excelsior Sari Nagusia deitu zioten.

Hainbat hamarkadatan gorabeherak izan ondotik, 2005ean UCI WorldTour programan parte hartzea lortu zuen, zeinak egutegi berean batzen baititu gizonezkoen maila goreneko txirrindularitzako errepideko lasterketa guztiak.

Gaur egun, Euskadiko Txirrindularitza Elkarteak arduratzen dira antolatzeaz, eta Itzuliak zirkuituko txirrindulari garrantzitsuenak biltzen ditu.

Itzuliaren irabazleak

Ez du izango batere lan samurra 2022ko Itzulia irabazi zuen Daniel Felipe Martínez bikainaren tokia hartu nahi duenak.

Eta are lan zailagoa izango du Itzulia lau aldiz irabazteko errekorra berdindu nahi duenak, José Antonio González Linaresek eta Alberto Contadorrek egin bezala.

2023ko Itzulian parte hartuko duten taldeak

Guztira 23 talde lehiatuko dira aurtengo Itzulian, apirilaren 8an (larunbata) podiumera igotzeko.

Haien artean, nazioarteko txirrindulari onenak ez ezik, “etxekoak” ere izango dira.

Talde hauek hartuko dute parte 2023ko Itzulian:

  • ACT-AG2R CITROEN TEAM
  • ADC-ALPECIN-DECEUNINCK
  • ARK-TEAM ARKEA – SAMSIC
  • AST-ASTANA QAZAQSTAN TEAM
  • BOH-BORA – HANSGROHE
  • COF-COFIDIS
  • DSM-TEAM DSM
  • EFE-EF EDUCATION – EASYPOST
  • GFC-GROUPAMA – FDJ
  • ICW-INTERMARCHÉ – CIRCUS – WANTY
  • IGD-INEOS GRENADIERS
  • JAY – TEAM JAYCO ALULA
  • MOV-MOVISTAR TEAM
  • SOQ-SOUDAL QUICK STEP
  • TBV – BAHRAIN VICTORIOUS
  • TFS-TREK SEGAFREDO
  • TJV-JUMBO-VISMA
  • UAD-UAE TEAM EMIRATES
  • BBH-BURGOS-BH
  • CJR-CAJA RURAL-SEGUROSRGA
  • EKP-EQUIPO KERN PHARMA
  • EUS-EUSKALTEL-EUSKADI

Euskaltel Euskadiren 2023ko Itzulirako taldea

Dagoeneko badakigu Euskaltel Euskadiko zein zazpi txirrindularik hartuko duten parte Itzulia Basque Country lasterketan:

Mikel Bizkarra, Joan Bou, Carlos Canal, Asier Etxeberria, Unai Iribar, Txomin Juaristi eta Gotzon Martín dira.

Dudarik gabe, erronka zaila izango dute, baina ilusioz gainezka daude. Ez da izango erraza, baina ziur gaude beren talentu eta ahalegin osoa jarriko dutela.

2023ko Itzuliaren ibilbidea

Basque Country Itzuliaren 62. edizioa 992,5 kilometroan barrena ibiliko da. Aurreko edizioetan baino kilometro gehiago dira, aurtengoan erlojupeko etaparik ez dela izango konpentsatzeko.

Ibilbideak Araba, Nafarroa, Gipuzkoa eta Bizkaia zeharkatuko ditu, ordena horretan, harik eta aurtengo azken helmugara iritsi arte; hau da, Eibarrera.

Txirrindulariek gogotik eman beharko diete pedalei 26 mendate puntuagarri igotzeko: lehenengo mailako hiru, bigarren mailako zazpi, eta hirugarren mailako hamasei.

2023ko Itzuliaren etapak

Gasteiztik abiatu eta Eibarren amaitu arte, badituzte makina bat kilometro aldapan gora igotzeko, eremu lauetan estrategiak praktikan ipintzeko eta esprint apoteosikoetan gogotik saiatzeko.

  • 1. etapa (apirilak 3, astelehena): Gasteiz – Bastida. Opakua mendatea igo eta azken esprinta Bastidan egingo dute, 165,40 kilometroko ibilbidea burutzeko.
  • 2. etapa (apirilak 4, asteartea): Viana – Leitza. Aurtengo Itzuliko etaparik luzeena da, eta 193,80 kilometroko ibilbidea du.
  • 3. etapa (apirilak 5, asteazkena): Errenteria – Villabona-Amasa. Gipuzkoako kostaldean zehar ibiliko den 153,90 kilometroko etapa hau Hikan amaituko da.
  • 4. etapa (apirilak 6, osteguna): Santurtzi – Santurtzi. 175,70 kilometroko etapa, Enkarterri aldeko aldapetan gora eta behera ibiliko dena.
  • 5. etapa (apirilak 7, ostirala): Amorebieta-Etxano – Amorebieta-Etxano. Mendate nabarmenik gabeko etapa da, baina ibilbide luzea du, 165,90 kilometro; aproposa posizioak finkatzeko, azken jardunaldiari begira.
  • 6. etapa (apirilak 8, larunbata): Eibar – Eibar. Azken etapak zazpi mendate puntuagarri ditu eta 3.600 metro baino gehiagoko desnibela, 137,80 kilometroan. Hantxe erabakiko da nor igoko den 2023ko Itzuliaren podiumera.

Itzulia Basque Challenge 2023, lehen zikloturista-proba

Aurten, Itzuliak zikloturista-proba bat estreinatuko du: Itzulia Basque Challenge 2023, zeina Eibarren egingo baita, apirilaren 9an (igandea).

Bi ibilbide izango ditu:

  • World Tour, Itzulia profesionaleko azken etaparen antzekoa
  • Iraupen ertainekoa, 80,6 kilometroko ibilbide laburrago eta samurragoarekin, zeinean lau mendate igoko baitira.

Itzulia Basque Challenge ekimena elkarrekin antolatuko dute Itzuliak eta Eibarko Udalak, eta Eibar 2023ko Kirolaren Europako Hiri gisa aitortu ondotik sortu da.

Marea Laranjarentzat, elastiko originala

Euskaltel Euskadiko gure taldea topera animatzeko prest?

Gainera, fan izateak saria du. Jakin nahi duzu zein den?

Aurtengo edizioan, elastiko originala izango dute mareako kideek; Kukuxumusuren diseinua da, eta Beelorzia ahuntza du protagonista.

Elastikoa munduko zale onenei egindako omenaldia da, eta etapa-hasieretan eta -amaieretan, taldearen busean nahiz Eibarko etapako “bihurgune laranjan” banatuko dugu.

Eta orain, baditugunez xehetasun gehiago Itzuliari, ibilbideari eta parte-hartzaileei buruz, hauxe esatea besterik ez zaigu geratzen... Gora marea laranja!