Urtarrilaren 5ean, ostirala, harrera egingo diegu ekialdetik datozen errege magoei. Jakin beharreko guztiaren berri emango dizugu, Gabonetako une magikoenetako bat bizitzeko aukera izan dezazun. Honelakoa da Donostiako errege-desfilea.

Igeldo mendira iristen direnetik Donostiako txoko guztietan opariak banatzeko unea arte, ekialdeko errege magoek bete-betea izaten dute lanen agenda. Desfile ezaguna ere egitekoen artean dute.

Errege magoak Donostiara iristea

Errege magoak urtarrilaren 5ean, ostirala, iritsiko dira Donostiara; zehazki, Igeldo mendira.

Han, gure hiria atzean dutela, selfi bat egiteko aprobetxatuko dute.

Handik, 10:50ean gutxi gorabehera, funikularrean jaitsiko dira Funikular plaza ezagunera.

Eta ongi lagunduta, gainera. Haiei harrera egitera joan diren txikiekin batera etorriko dira; izan ere, Udalak antolatutako lehiaketa irabazten duten txikiek horretarako aukera izango dute.

Hala, errege magoak 21 haurrekin batera iritsiko dira Donostiara 2024an.

11:00etan, hiriko auzoetara egin ohi duten bisitarekin hasiko dira. Hona Erregeen ibilbidea:

  • 11:00: Funikular plaza

  • 11:15: Loiolako Erriberak - María Zambrano plaza

  • 11:45: Txomin - Arteleku plaza

  • 12:20: Intxaurrondo - Sagastieder plaza

  • 12:55: Altza - Harria parkea

  • 13:25: Bidebieta - Joan XXIII.aren pasealekua

  • 14:20: Alderdi Eder - Donostiako Udaleko terraza

Errege magoen agurra eta harrera Donostian

Bazkalorduaren ondoren, 15:30etik 17:30era, errege magoen harreraren unea izango da, udalbatza-aretoan. Txikienen une gogokoenetako bat izaten da, erregeei gutunak emateko eta eskaerak egiteko aukera izaten baitute.

Ondoren, errege magoak beren jarraigo ugariarekin elkartuko dira, eta hiriko kale eta auzoetan zehar ibiliko dira.

Donostiako errege-desfilearen ibilbidea eta ordutegia

2024ko desfileak kolorez eta gabon-kutsuko magiaz beteko ditu Donostiako txoko eta auzo ugari.

Bulebarrean amaituko da, 18:00etan.

Donostiako errege-desfilearen ibilbidea toki hauetatik igaroko da:

  • Boulevarda (hasiera eta amaiera)

  • Hernani kalea

  • Askatasunaren hiribidea

  • Urbieta kalea

  • Prim kalea

  • Bergara kalea

  • Idiakez kalea

  • Gipuzkoa plaza

  • Legazpi kalea

Errege magoek ohitura dute desfilea amaitu ondoren ospitale eta zahar-etxe batzuk bisitatzeko. 2024an, egoitza hauek bisitatuko dituzte: San José de la Montaña, Villa Sacramento eta Matía Rezola.

Nolakoa den Donostiako errege-desfilea

Donostiako errege-desfilea Euskadiko ikusgarri eta jendetsuenetariko bat da.

Bost karrozak osatuko dute erregeen segizioa: "Jaiotza", María, Josef eta Jesus haurtxoarekin; "Gaspar", "Meltxor", "Baltasar" eta, guztietan berriena, buruhandien karroza, Garbera merkataritza-guneak babestua. Karroza bakoitzak bere jarraigo eta gai propioak ditu: itsas motiboak, ipuinetako pertsonaiak eta abar.

600 bat pertsonak osatzen dute desfilea: pajeak, errege-postariak, figuranteak eta mota guztietako pertsonaiak.

Trikitilari eta txarangak ere lagun dituztela, argi-, soinu- eta kolore-ikuskizunak alaitzen du guztia. Eta, nola ez, opariz betetako ibilgailuak ere ez dira falta izango.

Ikusi duzunez, berezi-berezia da Donostiako errege-desfilea. Adi egon ibilbidea eta ordutegia ateratzen denerako, eta gozatu topera.

Ea opari asko uzten dituzten zure etxean :)

Goiburuko irudiaren iturria: Donostia Kultura.