Ardoa protagonista nagusi delarik, sanmateoak ospatuko ditu Logroñok 2025eko irailaren 20tik 26ra. Mahats-biltzearen jaiak ere esaten zaie, eta egitarau luze-zabala prestatu dute aurten ere; ez dira falta karrozak, buruhandi eta erraldoiak, mahats-biltzaileak, kontzertuak eta, nola ez, mahats-zapaltzea. Kontsultatu hemen Logroñoko 2025eko sanmateoen egitaraua.
Logroñoko sanmateoak irailaren 20tik 26ra dira. Egun handian, irailaren 21ean, Mahats-biltzearen festa egiten da: 1956an egin zen aurreneko aldiz, eta Interes Turistikoko Espainiako Festa izendatu zen 1980an.
Logroñoko 2025eko sanmateoen egitaraua
Logroñoko 2025eko sanmateoen kartela. Iturria: Logroñoko Udala
Logroñoko 2025eko sanmateoak txupinazoarekin hasiko dira, larunbat goizean, hilak 20, eta irailaren 26an bukatuko (ostirala), upelaren ehorzketarekin.
Astebeteko jai-egitarau oparoa iragartzen ari da pixkana Logroñoko Udala.
Irailaren 20an (larunbata), jai-hasierako txupinazoa botako dute udaletxeko balkoitik, eta Carmen de la Fuente DJaren emanaldiak osatuko du ekitaldia.
Irailaren 21ean, igandean, jaietako beste hitzordu garrantzitsu bat: karrozen desfilea. Ardogintza tradizionalarekin lotutako elementuez jantzitako artisau-karrozez betetzen dira Logroñoko kaleak. Hiriko peñek, eskualde-etxeek, musika-taldeek, talde folklorikoek eta Errioxa osotik etorritako elkarteek eginak dira karrozok. Eta sariak banatzen dira, gainera, orijinalenentzat.
Ezin falta erraldoiak eta buruhandiak, jakina, guztiak ere Logroñoko eta Logroñoren historiako pertsonaiekin lotuak; esate baterako, Espartero jeneral ezagunarekin.
Su-festak ere izaten dira jaietan. Ribera parkean Su-festen Nazioarteko Lehiaketa egiten da. San Mateo festetako irabazlea arduratzen da gero ekainean ospatzen diren San Bernabe jaietako su-festez.
Kirolarentzat ere bada lekurik ekitaldien agendan. Logroñoko sanmateoetan, denboraldiko euskal pilotako lehiaketarik garrantzitsuenetako bat egiten da Adarraga frontoian.
Gainera, nonahi izaten dira kalejirak eta zezen-ikuskizunak, feria, zezenketak eta entzierroak barne. Eta ezin ditugu ahaztu eskualde-etxeek antolatzen dituzten jarduera ugariak.
Logroñoko Udalak eman ditu dagoeneko 2025eko sanmateoetako egitarauko xehetasun batzuk, hala nola kontzertuei buruzkoak, eta horien berri emango dizugu berehala.
Logroñoko 2025eko sanmateoetako kontzertuak
Logroñoko 2025eko sanmateoetako kontzertuak Udaletxe plazan, Santiago elizaren atzealdean edo Espoloi pasealekuan izango dira.
Aurten, gainera, Erriberako Parkeko San Mateo terrazan ere izango dira ekitaldiak; laster emango dizuegu haien berri.
2025eko sanmateoetako kontzertuen berri emango dizugu orain, iragarri baitituzte dagoeneko:
Irailak 20, larunbata
- Udaletxeko plaza: Carmen de la Fuente DJa.
- Santiago elizaren atzealdea: Bambino.
Irailak 21, igandea
- Udaletxeko plaza: Dollar Selmouni.
- Udaletxeko plaza: Mikel Izal.
Irailak 22, astelehena
- Merkatuko plaza: Víctor Puri.
- Espoloi pasealekua: Los Átomos.
Irailak 23, asteartea
- Espoloi pasealekua: Sabinari eta Serrati omenaldia.
- Udaletxeko plaza: La Rock-A.
Irailak 24, asteazkena
- Espoloi pasealekua: Jamaika Show orkestra.
Irailak 25, osteguna
- Udaletxeko plaza: Puro Relajo.
Sanmateoak Logroñon: Mahats-zapaltzea
Iturria: Logroñoko Udala
Logroñoko San Mateo Jaietako ekitaldi ospetsuenetako bat mahats-zapaltzea da. Irailaren 21ean egiten da, San Mateo egunean.
"Lehen Muztioaren eskaintza” egiten zaio Valvanerako Andre Mariari, eskualdeko zaindariari, hain zuzen. Gogoan izan behar da iraila dela eta laster jasoko dela mahatsa ardogintza-tradizio handiko herri honetan.
Duela zenbait hamarkadatik, Urdiales familia arduratzen da mahats-zapaltze sinboliko honetaz. Bertako jantzi tradizionala soinean (alkandora zuria, txalekoa eta gerriko gorria) eta oinutsik, biribilean besoetatik helduta denak, biraka hasten dira, treskan sartutako mahats-mordoak zapalduz, muztioa antzinako moduan egiteko.
Egun horretako ekitaldi sinbolikoenetako batek Errioxako txoko guztietatik heldutako haurrak ditu protagonista, denboraldiko lehen mahats-mordoekin betetzen baitute upel bat.
Orobat, mahatsa da protagonista jaien despedidan, “Mahats-erretzea” egiten baita udaletxeko plazan.
San Mateo jaietako aste gastronomikoa
Ardoaren lurraldean, nahitaezkoak dira mokadu goxo eta edari finak, eta San Mateo jaiak aprobetxatzen dira Aste Gastronomiko oso bat antolatzeko.
Bazkari-afari herrikoiak eta inguruko errezeten dastatzeak egin ohi dira; esate baterako, patatak txorizoarekin eta xirmendutan erretako saiheskiak eskaintzen dira.
Gainera, nahi izanez gero, txosnetara ere joan zaitezke (chamizo esaten diete Logroñon), hots, peñen lokaletara, non zurrakapotea eskainiko baitizute porroian edateko.
San Mateo jaien historia
XII. menderaino egin behar dugu atzera sanmateoen jatorria ezagutzeko, garai hartan Logroñoko hiribilduaren omenez egiten zen ospakizuneraino, hain zuzen.
Logroñok hiribildu kategoria lortua zuen orduan, eta urtean behin azoka antolatzeko eskubidea zuen. Esker Emate egunean egin ohi zen, eta urteko uzta oparoa eskertzea zuen helburu.
Pixkanaka, gero eta ludikoagoa eta festa-giro handiagokoa bihurtu zen ekitaldia, eta irailera aldatu zen, San Mateo egunera. Zerga-biltzaile izan zen San Mateo, eta merkatarien zaindari bihurtu zen azkenean (ez, ordea, Logroñokoa, haren zaindariak San Bartolome eta Itxaropenaren Andre Maria baitira).
Hala, beraz, tradizioa eta sinbolismoa ahaztu gabe baina ekitaldi-aukera gero eta gehiago zabalduz, gaur egunera arte heldu dira, 2025eko Logroñoko sanmateoetara.
Goiburuko irudiaren jatorria: Logroñoko Udala