Omako basoa: nola iritsi, erreserbak, ordutegia eta prezioak

Artea eta natura konbinatuta, Bizkaiko tokirik harrigarrienetako bat dugu: Omako basoa, Agustin Ibarrola bikainaren lana. Hara nola iritsi azalduko dizugu, eta erreserbei, ordutegiari eta prezioei buruzko nahitaezko informazio guztia emango dizugu.

Omako basoa, “Baso sorgindua” izenez ere ezaguna, Agustín Ibarrola euskal artistaren lanik ezagunenetako bat da.

Kortezubin dago, Bizkaian. Toki liluragarria, originala eta harrigarria da: kolore anitzeko pinturez eta forma ugariz beteta dago, eta ibiltzeko eta paseatzeko aukera ematen du; txundituta uzten gaitu, eta forma eta irudien sorta zabal hori geure erara interpretatzeko bidea ematen digu.

Nolakoa da Omako basoa?

1984an sortu zuen baso margotu original hau Agustín Ibarrola eskultore eta margolariak, eta 70eko hamarkadan sortutako Artea eta natura korrontearen barruan kokatzen da. Korronte horren helburu nagusia da artea naturara eramatea. Horrela, baso bat mihise originala bihurtzen da.

Omako basoa motibo eta irudi geometrikoz osatuta dago; motibo eta irudi horiek sakontasun-plano desberdinetan margotuta daude pinuen enborretan. Haietako asko bat datoz handik hurbil dagoen Santimamiñe leizeko irudikapen paleolitikoekin.

Kolore eta formen erakustaldi horrek bi eta hiru dimentsioekin jolasten du, baita bisitaria artelan baten erdigunean jartzearen esperientziarekin ere.

Irudikapen grafiko horietako batzuek jada badute funtsa beren kabuz, baina Omako basoak pertsonalizazioaren ideiaren alde egiten du, eta bisitari bakoitzak bere espazioa sortzea eta bere erara interpretatzea nahi du. Nahiz eta markatutako bidexketatik joan behar duzun, zuk aukeratzen duzu zer ordenatan ibili nahi dituzun, edo zer angelutatik begiratzen duzun, tokiaren zeure ikuspuntua izateko.

Omako baso berria

Gaur egungo Omako basoa, zinez, bigarrena da. Lehenengoa 60ko hamarkadaren amaieran sortu zen, baina “banda marroiaren” gaixotasunak jo zituen zuhaitzak, eta itxi egin behar izan zuten, segurtasunagatik.

Beraz, beste kokapen bat bilatu zen, jatorrizko basoaren pareko baldintza morfologikoak eta antzeko ezaugarri eta adineko pinuak zituena. Baina, batez ere, espiritu bera zuena.

Omako baso berria jasangarriagoa, irisgarriagoa eta osatuagoa da, baina jatorrizkoaren funtsari eusten dio. Hor jarraitzen du lanaren eta ingurunearen arteko loturak, eta hor ere bisitaria da lanaren ardatz.

Omako basoak hamar bat hektarea ditu. Kilometro eta erdi inguruko ibilbide artistiko horretan, bisitariek lanaren 34 multzoak osatzen dituzten 800dik gorako zuhaitzak ezagutzen dituzte. Instagramen gehien agertzen direnen artean, enblematikoenetako batzuk daude; esaterako, Naielen ostadarra eta Begiak.

Omako basoko multzoen zerrenda osoa

Sarbidea

Sarrerako ataria

1. Lerro horizontala

2. Musua

3. Naielen ostadarra

4. Horizontala, diagonala, bertikala

5. Konkaboa-konbexua harremana

6. Tximista

7. 57 taldea

8. Bertikaltasuna eta haren mugimendua

9. Motor-gidariak

10. Gizateriaren martxa

11. Erraldoi gorria

12. Begiak

Atsedengunea

13. Malevitx artistari omenaldia

14. Zirkulua

15. Grekoari omenaldia

16. Basoko animaliak

17. Sugarra

18. Uhin zuria

19. Lerro zurien bihurdura

20. Puntillismoa

21. Erritmo inguratzaileak

22. Konposizio laranja eta morea

23. Mehatxu nuklearra

24. Koloredun zirkuluak

25. Kordobako meskita

26. Minimal

27. Diagonal bidimentsionala

28. Zirkulu irekiak

29. Kurba eta kontrakurba

30. Negatibo-positiboa

Behatokia

31. Errubrika

32. Maite zaitut

33. Erronbo horia

34. Haritzari omenaldia

Nola iristen da Omako basora?

Omako basoa izen bereko auzo eta bailaran kokatuta dago, Kortezubin, Bizkaiko Urdaibai biosfera-erreserban.

Hara iristeko, BI-4244 errepidea hartu behar duzu, eta amaieraraino joan; han, Omako basora iristeko seinaleak daude, baita aparkalekua ere.

Kontuan izan behar da oinez baino ezin dela heldu basora, haraino doan bidean debekatuta baitaude ibilgailu motordunak. Bide hori oso ondo seinaleztatuta dago, eta ez du zailtasun handirik.

Gomendio-pare bat Omako basora joaten zarenerako: eraman arropa erosoa eta ura, bai baitaude atseden hartzeko eta jateko prestatutako tokiak, baina ez baitago iturririk. Abisu-pare bat: Omako basoa ez dago gurpil-aulkietarako eta haur-kotxeetarako egokituta; eta txakurra eraman dezakezu, baina lotuta eraman behar duzu denbora guztian.

Non erosten dira Omako basorako sarrerak?

Omako basora etorri nahi baduzu, aukeran duzu bisita librea edo bisita gidatua egitea.

Bi kasuetan, nahitaezkoa da sarrera erreserbatzea, eta Santimamiñe-Omako arretarako gunean baliozkotu beharko duzu, sarreran adierazitako ordua baino ordubete lehenago. Gogoan izan Santimamiñetik Omako basorainoko ibilbidea 2,8 kilometro luze dela eta gutxi gorabehera 50 minutuan egiten dela.

Omako basoaren webgune ofizialean egin dezakezu onlineko erreserba.

Sarrera doakoa da, eta ez dago ordutegirik; alegia, nahi duzunean ibil dezakezu Omako basoa (erreserbatu duzun ordu-tartean).

Edozein zalantza izanez gero, idatzi mezu bat [email protected] helbidera, edo deitu 94 465 16 57 telefonora.

Gainera, zurekin eraman dezakezu Omako basoa, aplikazioarekin (iOS-erako eta Android-erako erabilgarri).

Zer ikus daiteke Omako basoaren inguruetan?

Esan dizugun moduan, Omako basoa bene-benetako artelana da, baina, horretaz gain, inguruan badira beste zenbait interesgune ere, eta merezi du haiek bisitatzea.

Haietako bat Santimamiñe leizea da; UNESCOk gizadiaren ondare izendatu zuen, eta kultura prehistorikoaren Bizkaiko tokirik enblematikoenen artean dago. Barruan, bisonte, ahuntz edo zaldien pinturak aurki ditzakegu.

Hondartzak gustuko izanez gero, Laida eta Laga hondartzetara joan-etorria egitea gomendatzen dugu; biak Urdaibain daude, UNESCOk biosfera-erreserba izendatuan. Laida hareatza handi bat da, eta haren forma aldakorrek txundituta uzten dituzte bisitariak; aldiz, Laga sekulako olatuak dituen hondartza basati bat da.

Omako basoaren inguruko beste leku xarmagarri batzuk Ogoñoko ibilbidea eta behatokia, Basondoko babeslekua eta Gaztelugatxe uhartea dira.

Nor da Agustín Ibarrola?

Agustín Ibarrola Omako basoaren sortzailea eta arima da. Bilbon jaio zen, eta autodidakta izan zen: hasieran behintzat, Europako korronte kubistei eta abstraktuei lotuta egon zen. Gehiago interesatzen zitzaion alderdi soziala, intelektuala baino, eta, premisa horretan oinarrituta, 57 taldea sortu zuen, beste artista batzuekin batera.

Estilo eta joera jakin batean nekez sailka daitezkeen diziplina anitzeko material, lengoaia eta ezagutzak konbinatzen ditu haren lanak.

Aire zabaleko arte publikoan, bitarteko ezin hobea aurkitu zuen bere sormena eta gizarte-aldarrikapen kolektiborako etengabeko grina bideratzeko.

Omako basoa haren artearen erakustaldirik bereizgarri eta bikainenetako bat da. Eta nahitaez ikusi beharrekoa da Bizkaian.

Egin tartea agendan, eta presta zaitez Omako basoa ezagutzeko, artez, naturaz eta gizarte-kontzientziaz gainezka dagoen benetako “baso sorgindu” bat.

Goiburuko irudia: Bizkaiko Foru Aldundia