Adimen artifizial fisikoa (Physical AI) eredu adimendunak eta mundu fisikoa uztartzen dituen AAren adar bat da. Robotak, sentsoreak, makinak, ibilgailuak, droneak nahiz sistema industrialak izan daitezke, eta horiek gai dira ingurune errealetan hautemateko, arrazoitzeko eta jarduteko.

AA estandarrarekiko alde nagusia da adimen artifizial fisikoak, informazio digitala prozesatzeaz gain, fisikarekin ere elkarreraginean jarduten duela (grabitatea, mugimendua, marruskadura, objektuak, pertsonak, espazioak, denbora erreala, etab.).

Zer teknologia erabiltzen ditu adimen artifizial fisikoak?

Adimen artifizial fisikoak zenbait teknologia eta eredu konbinatzen ditu:

  • Deep Learning: erabakiak hartzeko

  • Ikusmen artifiziala: ingurunea behatzeko

  • Robotika: mugitzeko eta jarduteko

  • Sentsoreak: datu fisikoak jasotzeko

  • Simulazio fisikoa: mundu birtualetan entrenatzeko

  • Edge computing: denbora errealean erantzuteko

Adimen artifizial fisikoaren abantailak

Zergatik ari da hedatzen adimen artifizial fisikoa (Physical AI)?

  • AAren gaur egungo eredu multimodalak askoz ahaltsuagoak dira, eta gai dira irudiak, ahotsa, espazioa eta ekintzak ulertzeko.

  • Simulazioa asko hobetu da, eta, horri esker, robotak mundu birtual errealistetan trebatu daitezke, benetako hardwarea erabili aurretik.

  • Hardwarea eskuragarriagoa eta ahaltsuagoa da.

  • Latentzia minimizatu egin da, eta, horri esker, aukera gehiago ditugu, batez ere denbora errealeko aplikazioetan.

AA sortzailearen eta AA fisikoaren arteko aldea

Zertan bereizten dira AA sortzailea eta AA fisikoa?

Hauxe da bien arteko alde nabarmenena: AA sortzaileak testuak eta irudiak sortzen ditu, eta softwarean zentratzen da; AA fisikoak, berriz, mundu errealean jarduten du, eta makina eta gailuetan eragiten du batez ere.

Baina, desberdinak izan arren, biek dituzte arriskuak. AA sortzailearen kasuan, arrisku nabarmenenak informazio-akatsak izan ohi dira; adimen artifizial fisikoaren kasuan, berriz, beste aldagai bat sartzen da jokoan: istripuak edo arrisku fisikoak izateko aukera (objektuak erortzea, pertsonak mugitzea, edo argia eta tenperatura aldatzea, adibidez). Erronka nagusia da kalteak eta gorabehera fisikoak minimizatzea.

Adimen artifizial fisikoaren erabileraren adibide praktikoak

Adimen artifizial fisikoak pentsatu egiten du, eta, gainera, mundu fisikoan jarduten du. Horri esker, hauek sor daitezke, besteak beste:

  • Robot humanoideak, ibiltzen direnak, objektuak manipulatzen dituztenak, aginduak ulertzen dituztenak eta zeregin fisikoak egiten ikasten dutenak.

  • Ibilgailu autonomoak, kamerak, radarrak eta AAko ereduak erabiltzen dituztenak oinezkoak detektatzeko, ibilbideak kalkulatzeko eta ingurunean fisikoki mugitzeko.

  • Fabrika adimendunak, zeinetan erabiltzen baitira robot kolaboratiboak, mantentze-lan prediktiboak, logistika automatikoa, ikuskapen bisuala eta optimizazio energetikoa.