Euskadin bada makina bat paraje ezagutzeko. Baina badira batzuk nahitaez bisitatu beharrekoak. Butroeko gaztelua da horietako bat. Jarraian, azalduko dizugu Butroeko gaztelura nola iritsi, zer ikusi, nolakoa den gaztelua barrutik —nahiz eta ez dagoen bisitatzerik—, eta zer lotura duten Butroeko gazteluak eta telesailak.
Butroeko gaztelua
Butroeko gazteluak Erdi Arora eramaten gaitu zuzenean, eta, zehazkiago, bandokideen arteko gatazken garaietara. Gatikan dago, Bilbo eta Gaztelugatxe arteko muino batean, eta ehun urtetik gorako baso bat dauka buelta guztian.
Baliteke ezaguna egitea, eta ez da batere harritzekoa. Gaztelu honetan zenbait film eta telesail grabatu dituzte. Guztietan ospetsuena, . Kokagunea apartekoa da ukitu fantastikoa edo Erdi Aroko giroa duen edozein ekoizpenetarako.
Nola iritsi Butroeko gaztelura
Gaztelua Bizkaiko Gatika udalerrian dago. Butroera iristeko, garraio publikoa zein pribatua balia dezakegu. Oinez ere irits daiteke, Plentziatik abiatuta. Ez da bide luzea.
- Garraio publikoan: Butroeko gaztelura garraio publikoan iristeko, Bizkaibuseko A3225 eta A3531 lineak dira aukera onena. Gomendagarria da Bizkaibusen webgunea bisitatzea, autobusen maiztasunak eta ordutegiak egiaztatzeko. Horixe da Butroeko gaztelura iristeko modurik errazena, dela Bilbotik, dela autobus-lineak igarotzen diren inguruko herrietatik.
- Garraio pribatuan: Norberaren autoan joanez gero, gomendagarria da Txorierriko korridorea (BI-30), eta, ondoren, Mungiako irteera hartzea (BI-631 errepidea). Mungian, BI-634 errepidetik barrena abiatuko gara Gatika aldera. Iristean, gazteluaren ondoan aparkaleku txiki bat dago, eta doan aparka daiteke.
Iristeko beste modu bat BI-3121 errepidea hartzea da, Urdulizetik Mungiarako norabidean irtenda. Gatika udalerrira sartzean, ezkerretara ikusten da gaztelua, bide nagusitik pixka bat bereizita.
Gaztelura doan bidexka estua hartu behar da.
Zer ikusi Butroeko gazteluan
Gaur egun, Butroeko gaztelua kanpotik bakarrik ikus daiteke. Iraganean, izan zen aukerarik Butroeko gaztelu barrura ere sartzeko, bisita gidatuekin. Gaur egun ezinezkoa da.
Ez da beharrezkoa erreserba egitea Butroeko gazteluaren kanpoaldea bisitatzeko, eta ez dago ordutegirik. Hau da, nahi denean bisita daiteke, espazio irekia baita. Merezi du bertara hurbiltzea, eta nahitaezko bisita da inguruko tokiren bat ezagutzea pentsatu baduzue —San Joan Gaztelugatxekoa, esaterako—.
Posible da gaztelua oinez inguratzea, egituraren xehetasun guztiak ikusteko. Ez du luze jotzen; izan ere, gaur egun, ez du eskaera handirik turismoari dagokionez. Dena den, gerta liteke ibilgailua aparkatzeko arazoren bat izatea goi-denboraldian.
Butroeko gaztelutik gertu, badira zenbait toki, mahai eta guzti, egun eder bat igarotzeko familia-giroan.
Nolakoa da barrutik Butroeko gaztelua?
Eraikinak 2.400 metro koadro baino gehiago ditu, eta 35.000 metro koadrotik gorako parke batean dago.
Eraikinak beheko solairua, solairuartea, bost solairu, estalkia eta lau dorre ditu —Omenaldiaren dorrea da lauretan garaiena—. Gazteluko hormak lau metro baino lodiago dira pare batzuetan.
Barruan hainbat eratako gelak daude: aretoak, arma-patioa, gonbidatuei harrera egiteko gune bat, garai bateko kapera, beheko sua duen gela, 200 metro koadroko gela handi eta zabal bat, janari-biltegia, ur naturaleko putzu bat, liburutegi bat, bi bainugela eta ziega bat.
Ingurua, gainera, oso atsegina da. Eraikina parke batean dago, zeinean bertako espezieak ez ezik exotikoak ere bai baitaude. Dena den, abandonatu samarrik dago gaur egun. Butroe ibaiaren ur bildu batek inguratzen du multzo osoa. Ur bildu hori babes-erreten gisa sortua da, eta zubi batetik igaro behar da gaztelura sartzeko.
Game of Thrones eta Butroeko gaztelua
Butroeko gazteluaren edertasunak Game of Thrones telesail ospetsuaren ekoizleak ere erakarri zituen.
Butroeko gaztelua izan zen, hain justu, seigarren denboraldiko agertokietako bat. Tarly etxearen gotorleku gisa erabili zuten —Zazpi Erreinuetako etxe nobleetako batena, alegia—.
Eszena ugari filmatu zituzten gazteluan, hala nola Samwell Tarly eta Gilly gotorlekura babes bila iristen direnekoa.
Butroe, historia handiko gaztelua
Eraikina Erdi Arokoa da, Butroe leinuaren dorretxea zen garaikoa. Sortu eta mende batera, Butroeko jaunak gaztelu bihurtu zuen.
XVI. mendean hasi eta hirurehun urtean baino gehiagoan, Bizkaiko nobleziako bi bandoren arteko borroka etengabeen eta gordinen agertoki izan zen. Butroeko jaunek, gazteluan babesturik, inguruko lurraldean agintzen zuten.
Gaztelua aldatuz joan da mendeetan zehar, eta nekazari-etxe baten tankera zuen amaiera aldera, harik eta Francisco Cubas arkitektoak XIX. mendean berritu zuen arte.
Gazteluaren egungo itxura
Bandoen arteko borroka odoltsuen ondoren, XVI. mendearen hasieran, Butroeko gaztelua abandonatuta geratu zen. Hala, hondatuz joan zen, harik eta XIX. mendearen amaieran zaharberritu eta egungo itxura eman zioten arte.
Francisco de Cubas arkitektoa arduratu zen lanez, eta 1878an berreraiki zuen, garai hartan Europako gazteluei buruz zituzten irizpide askeei jarraituz.
Zimenduak eta dorre zilindrikoen parte batean oinarriturik, Francisco de Cubasek ezabatu egin zituen eranskinak eta, irudimen handiz, XIX. mendeko gaztelu bavariarretan inspiratuta berreraiki zuen, erabat aldendurik inguruotako dorretxe eta gazteluen prototipoetatik.
Omenaldiaren dorrea, adibidez, Segoviako alkazarraren antzekoa da. Oro har, denbora-pasa eta ikusteko erakarpen gisa pentsatu zen eraikina, eta ez hainbeste erabilera jakin bat izateko.
Gaur egun, oso deserosoa da etxebizitza gisa, dorreek ez baitute leku erabilgarri handirik, eta gela batzuk pasabideen eta aire zabaleko eskaileren bidez daude lotuta.
Orain badakizu Butroeko gazteluaren historia, nolakoa den, zer ikusi eta nola iritsi. Gauza asko ditu erakargarriak. Beraz, ezin duzu galdu gure lurraldeko Erdi Aroko paraje hau.
Goiburuko irudiaren letra-mota: Bilbao Bizkaia Turismoa.