Synthesia adimen artifizialeko tresna bat da, abatar birtualekin bideoak sortzen espezializatua.

Zertarako balio duen Synthesiak

Synthesiarekin, gidoi bat idatz dezakezu, eta abatar bat aukeratu gidoi hori ahots eta aurpegi-adierazpen errealistarekin kontatzeko.

Eskaintzen dituen aukera ugariei eta sortzen dituen kalitate eta errealismo handiko lanei esker, oso tresna erabilia bihurtu da enpresa-inguruneetan. Zer egin dezakezu Synthesiarekin?

  • Abatar digital errealistak sortu.

  • Ahotsak sortu hizkuntza askotan (140tik gora).

  • Bikoizketa, azpitituluak automatikoki sartzeko aukerarekin.

  • Testutik multimedia sortu, kameraren beharrik gabe.

  • Edukiak sortu. Askotariko edukien integrazioa errazteko tresnak ditu, eta txantiloi-sorta zabala.

  • Bideoak automatikoki itzuli.

Zertarako erabiltzen da Synthesia?

Synthesiarekin sortutako lanak honako hauetan erabil daitezke:

  • E-learninga eta prestakuntza: ikastaroak sor daitezke benetako aktoreen beharrik gabe.

  • Bezeroarentzako arreta: ohiko galderei erantzuten dieten bideoak sor daitezke.

  • Informazioa: prozedurei, salmenta-politikei edo bidalketen kudeaketari buruzko azalpen-bideoak, adibidez.

  • Marketina eta publizitatea, kalitate handiko eta ekoizpen garestirik gabeko sustapen-bideoen bidez.

  • Enpresarako aurkezpen dinamiko eta automatizatuak.

  • Laguntzaile birtual edo chatbotak

Nola funtzionatzen du Synthesiak?

Bideo- eta audio-grabazioen bidez entrenatua dago Synthesia, eta haren algoritmoa gai da hizketako mugimenduak, ahoskera eta aurpegiak erreproduzitzeko, multimedia-eduki bikaina sortzeko.

Plataformak berak AArekin sortutako abatarrak erabil daitezke, edo norberaren irudikapen digitalak eta abatar pertsonalak sortu (biki digitalak).

Nolanahi ere, oso erraza da Synthesiarekin edukia sortzea.

Aukera ematen du gidoi bat egiteko abiapuntutzat URL bat, dokumentu bat edo ideia soil bat hartuta. Gero, tresnak ahots edo/eta bideo bihurtzen du testu hori.

Sortutako bideo guztiak pertsonalizatu daitezke; erraz aukeratu daitezke (edo ordeztu) koloreak, letra-motak, diseinua edo abatarra, edo norberaren marka-irudia erantsi.

Eta partekatu daitezke, bai iruzkinak jasotzeko, bai prestaketa-fasean talde-lanean aritzeko.

Behin sortuta dagoela, bideoa deskargatu egiten da, eta esteka bat sortzen da partekatzeko edo nahi duzun lekuan txertatzeko. Synthesiak eskaintzen dituen diseinuak erraz integratzen dira LMSekin (ikaskuntza kudeatzeko sistemak).

Bestalde, Synthesiak bereziki zaintzen ditu segurtasuna eta etika. Bideoak sortzean AAren erabilera arduratsua bermatzen duten moderazio-prozesuak eta politikak ditu.

Albiste faltsuak eta manipulazioak saihesteko, debekatu egiten du eremu publiko eta pribatuko pertsonaia ospetsuen klonak sortzea onespenik gabe. Aurre-hautapen zorrotz baten ondoren baimen esplizitu bat izanda soilik egin dezakezu hori.

Doakoa da Synthesia?

Bai, Synthesiak badu doako plan bat, AArekin bideoak doan sortzeko aukera ematen duena.

Bertsio libre horrekin, hauek egin ditzakezu: hilean 3 minutu bideo, 6 abatar generiko eta ahots-sorta zabal bat, AArekin sortuak, 140 hizkuntzatan baino gehiagotan.